DA, PCIC nag-awhag sa mga hog raisers mopahimulos sa insurance packages

By Gideon C. Corgue

PAGADIAN CITY, August 3 (PIA)— Ang Department of Agriculture (DA) ug Philippine Crop Insurance Corporation (PCIC) nag-awhag sa backyard ug commercial hog raisers mopahimulos sa  insurance pacakages aron makuha nila ug balik ang  ilang pagpamuhunan, kung ang ilang umahan maapektuhan sa African Swine Fever (ASF).

Sa gipahigayon nga panagtigum sa mga tinigyanan sa City Agriculture’s Office ug City Veterinary Office, gipahibalo ni Pinky Bomediano, ang Insurance Underwriter sa PCIC-9 nga gipakusog sa DA ang mga paningkamot nga awhagon ang mga hog raisers nga makabalik sa negosyo ug tabangan pagbuhi ug baboy pinaagi sa pagpahimulos sa insurance coverage ilabi na usab  sa mga lugar nga wala’y ASF.

Matud pa ni  Bomediano nga ang ilang buhatan nakadawat ug marching order gikan ni Secretary William Dar sa DA nga ipa-insure ang mga baboy tungod sa kasamtangang hulga sa ASF sa nasud.

Gidasig usab ni Bomediano ang mga agricultural stakeholders nga mapahimuslan ang libre nga insurance coverage tungod kay ang  kagamhanan adunay gigahin nga P51 milyones nga pundo ilawom sa hog repopulation program alang sa dakbayan.

Ang PCIC,  City Agriculture Office ug City Veterinary Office gikatakda nga magpirma ug memorandum of agreement (MOA) aron nga ang maong programa suportahan sa mga hog raisers.   (GCC/PIA-Zamboanga del Sur)