By Gideon C. Corgue
LAKEWOOD, Zamboanga del Sur, September 24 (PIA)—Mokabat sa 200 ka kabus
sa Barangay Baking, Lakewood ang nakapahimulos sa ubay-ubay nga serbisyong
gihatud sa mga nasudnong ahensya sa kagamhanan atol sa gipahigayon nga
Mini-Caravan.
Matud ni Atty.
Ferdinand Iman, Chief Operations for Mindanao-Presidential Commission for Urban
Poor (PCUP), ang mga programa ug serbisyo sa 30 ka nasudnong ahensya maoy
nagsilbing tulay tali sa kagamhanan sa urban poor aron mahatud ang mga
nagkadaiyang serbisyo sa kagamhanan ngadto sa mga kabus nga katawhan.
“Pinaagi ning namugna nga
Mini-Caravan dili na kinahanglang moadto ang mga tawo sa opisina sa
kagamhanan tungod kay gidala na sa ilang
barangay ang mga programa ug serbisyo sa kagamhanan,” pahayag ni Atty. Iman.
Sa maong kalihokan, ang Department of Health naghatag ug libre
nga medical consultation, mga tambal ug vitamins, 300 ka balde nga hygiene kits
ug nagtanyag usab sa libre nga bakuna batok sa COVID-19.
Ang Department of
Environment and Natural Resources naghatag ug libre nga consultation sa
national greening programs, land titling, ug naghatag ug libre nga mga
seedlings.
Samtang ang ubang mga ahensya, naghatag ug kasayuran sa mga molupyo aron ipadayag ang programa, serbisyo ug mga kaayuhan nga mahimo nilang maangkon pinaagi sa nagkadaiyang buhatan.(NBE/GCC/PIA-Zamboanga del Sur)
No comments:
Post a Comment