ZDSMC nakasinati sa kritikal nga supply sa medical oxygen

 

By Gideon C. Corgue

PAGADIAN CITY, Sept 17 (PIA)— Ang Zamboanga del Sur Medical Center (ZDSMC) nagpahibalo sa mga katawhan sa lalawigan nga kritikal na ang supply niini sa medical oxygen.

Matud pa ni Dr. Anatalio Cagampang, Jr., ang hepe sa ZDSMC, dili na makahatag ug igo nga supply sa oxygen ang mga suppliers karong panahona.

Dili usab makahatag ug kaseguruhan ang ZDSMC nga mahatagan nila ug oxygen ang mga pasyente sa COVID-19, busa nag awhag sila sa publiko nga kung mahimo, magdala sila sa ilang kaugalingong oxygen inig magpa-ospital.

Gipahayag ni Flora Miraflor, ang Provincial Director sa Department of Trade and Industry (DTI) nga base sa monitoring sa ilang ahensya, nasayran nga nahutdan na ug supply sa medical oxygen ang mga tindahan sa dakbayan sa Pagadian ug sa mga kasigpit nga kalungsuran sa lalawigan.

Bisan ug nahurot na ang supply sa oxygen sa lalawigan, si Miraflor mipahibalo nga wala miuswag ang presyo sa oxygen sa mga tindahan.

Gipatin-aw ni Miraflor nga ilawom sa “Price Act”, walay gahum ang DTI nga magpatuman ug price control sa medical oxygen tungod kay kini nga commodity nasakop sa control sa Department of Health. (NBE/GCC/PIA-Zamboanga del Sur)