ZDSMC magpahigayon ug breast examination sa mga health workers, pasyente

 By Gideon C. Corgue

PAGADIAN CITY, October 20 (PIA)— Ang Zamboanga del Sur Medical Center (ZDSMC) magsaulog sa Breast Cancer Awareness Month ning bulan sa Oktubre ning tuiga pinaagi sa pagpahigayon sa breast examination.

Matud ni Dr. Anatalio Cagampang, Jr., ang hepe sa Integrated Provincial Health Office ug kasamtangan nga administrator sa Zamboanga del Sur Medical Center (ZDSMC), ang Out Patient Department sa nasangpit nga balay tambalanan magpahigayon ug medical check up sa mga babaye nga health care workers ug breast examination sa mga babaye nga pasyente karong Oktubre 26 ning tuiga.

Dugang ni Cagampang nga ang breast examination mao ang kabahin sa kalihokan sa pag-obserbar sa Breast Cancer Awareness Month sa Oktubre.

Ang breast examination, usa ka pamaagi aron mahibal-an ang bisan unsang mamatikdan nga pagbag-o sa suso sa usa ka tawo. Ang sayo nga pag-ila sa bisan unsang mga pagbag-o sa suso ug mopailawom dayon sa madalion nga pagkonsulta ang makadugang sa higayon nga malampuson ang pagtambal niini.

Bisan sa nagpadayon nga pagsinati sa COVID-19 pandemic, gi-awhag sa nasangpit nga doktor ang mga kababayen-an nga magpadayon sa pagsusi sa ilang suso ug magpagkonsulta o teleconsultation sa mga nag-una nga doctor aron dili makaangkon sa maong sakit. (NBE/GCC/PIA-Zamboanga del Sur)