Pagadian City nagsugod pagbakuna sa pediatric population

 

By Gideon C. Corgue

PAGADIAN CITY, November 04 (PIA)—Ang Pagadian City government opisyal nga naglusad sa vaccination sa general pediatric population nga may edad 12 ngadto sa 17 ka tuig. Gipahigayon kini sa vaccination hub sa dakbayan ning Miyerkoles, Nobyembre 3.

Sa unang adlaw sa pediatric vaccination, wala gipalabay ang panahon ni Dr. Jose Hofeliña, tag-iya sa Hofeliña Hospital ning dakbayan ang iyang tulo ka mga anak nga si Jose IV, Jose V ug Juliana ug iya kini nga gidala sa vaccination hub aron mabakunahan gilayon sa covid-19 vaccine.

Matud ni Hofeliña, isip usa ka doktor ug amahan, buot niya nga mapanalipdan ang iyang mga anak sa makamatay nga Coronavirus Disease 2019 (COVID-19).

“Ang pagpabakuna sa akong mga anak mao ang pinaka maayo nga Christmas gift nga akong mahatag ngadto kanila. Mao lamang kini ang pinakamaayong paagi nga mapanalipdan ang akong mga anak gikan sa COVID-19,” malipayon nga gipahibalo ni Hofeliña.

Matud pa niya nga dili kalikayan nga ang mga bata makig-uban ug makigsuroy sa ilang mga classmates ug busa naay posibilidad nga matakdan sila sa makamatay nga virus.

“Ang COVID-19 paspas nga motakod ug makamatay ilabi na gayud ang Delta Variant busa akong gipabakunahan gilayon ang akong mga anak,” matud pa ni Hofeliña, kinsa hingpit usab nga bakunado.

Ang kagamhanan sa dakbayan nagtumong nga mabakunahan ang tanang kabataan ug estudyante nga nagtungha sa dakbayan ning bulan sa Nobyembre. (NBE/GCC/PIA-Zamboanga del Sur)