Dos mil ka mga similya sa klase-klasing kahoy ug kawayan, ang natanum sa halos kinyentos ka mga partisipante sa nagmalampusong gipahigayon nga nasudnong Bamboo and Tree Planting Activity didto sa Mt. Lab, barangay Sto. Niño dakbayan sa Dapitan kagahapon sa buntag, Setyembre 13.
Si Sto. Niño Brgy. Kapitan Crisologo Jumuad nagpasalamat sa kagamhanang probinsyal sa pagpangulo ni Governor Rosalina “Nanay Nene” Jalosjos uban sa mga kadagkoan niini lakip ang 50ka mga barangay sa dakbayan sa Dapitan.
Dako ang pasalamat ni Jumuad kay ang ilang barangay maoy nahimong gitamnan sa maong 2mil ka mga seedlings, bisan paman sa kabungtod sa ilang lugar.
Asoy ni Kapitan Jumuad nga mismo ang mga barangay opisyales ang moatiman sa maong gipangtanum tungod kay daku kinig ikatabang ilabinag mudagko na ang mga kahoy.
Gibutyag sa Kapitan nga ang ilang barangay matag ting-init makabsan sila sa tubig sa ilang mga tubod ug nagtuo sila nga kon managko na ang mga kahoy nga gipangtanum, makatabang kini nga moabunda kon mokusog ang ilang mga tubod nga maoy ilang gisaligan.
Sa samang bahin ang Assistant Regional Director sa Department of Interior and Local Government (DILG) nga si Engr. Carmilo Enrique Libut, mipadayag usab sa iyang pagdayeg ug pasalamat sa kagamhanang probinsyal pinaagi ni Nanay Nene sa dakung suporta niini nga nahimong nagmalampuson ang maong nationwide bamboo and tree planting activity.
Gidayeg sa DILG nga ang kooperasyon ug panaghiusa sa LGU nga nagmabulukon ang nasangpit nga kalihukan.
Nanghinaut kini nga mapadayun ang pagpananum sa mga kahoy bisan sa mga bakanteng luna aron masalbar ang kinaiyahan ilabina kay adunay climate change nga ang tanan naapektuhan.
Gikahibaloan nga si Governor Jalosjos ang padayon kining mosuporta sa tanang kalihukan ug programa alang sa kalambuan ug kaayuhan sa katawhan ning lalawigan sa Zamboanga del Norte. (PIC-Joeue Sacol Ramirez-Writer, Rosie Jane Villorejo-News Gatherer, Raymond Garrovillo-Cameraman)
No comments:
Post a Comment