Mga pasyente sa COVID-19 sa ZDSMC gipahiluna sulod sa tent, sakyanan

By Gideon C. Corgue

PAGADIAN CITY, Sept 6 (PIA)— Ang Zamboanga del Sur Medical Center (ZDSMC) napuno sa mga pasyente nga positibo sa COVID-19 busa wala nay mga higdaanan nga kabutangan sa mga kritikal nga pasyente.

Kini maoy subo nga gipahibalo ni Dr. Anatalio Cagampang, Jr., hepe sa Integrated Provincial Health Office atol sa interview sa DXPR Radio Station ngadto kaniya ning bag-o pa lang.  

Matud pa ni Cagampang, sa census nga ilang gihimo sa 220 ka mga pasyente sa ZDSMC, 190 niini ang nataptan sa COVID-19 samtang ang 30 mga non-COVID patients. 

Dugang pa ni Cagampang nga milapas na sila sa gi-aprobahan sa Department of Health nga 100 bed capacity alang sa COVID-19 busa gibutang na lamang ang sobra sa gawas sa emergency room nga nakapasilong sa tents ug mga sakyanan.

Bisan pa sa lisod kahimtang sa ZDSMC, gipahibalo sa hepe sa IPHO nga ang ilang dawaton sa hospital kadtong lamang mga severe o critical COVID-19 patients samtang ang mga pasyente nga may moderate COVID-19 i-refer nila sa ubang hospital.

Si Cagampang mipahimangno nga sa sitwasyon karon, ang mga katawhan na ang mga frontliners, samtang ang mga health workers mao na ang mga last line of defense tungod kay ang giyera karon sa COVID-19 anaa na gawas sa komunidad (RVC/EDT/GCC/PIA-Zamboanga del Sur)