PYDO sa Sulu aktibo nakiglambigit sa komunidad

 By Gideon C. Corgue

PAGADIAN CITY, September 14 (PIA)— Ang Provincial Youth Development Office (PYDO) sa lalawigan sa Sulu aktibo sa pakiglambigit sa komunidad.

Kini maoy gipahayag ni Aljiber Ismael, ang PYDO Officer sa Laging Handa Network Briefing nga gidumala ni PCOO Secretary Martin Andanar ning adlaw’ng Miyerkoles. 

Matud pa ni Ismael bisan pa sa kasamtangang hulga nga giatubang sa katawhan sa Coronavirus Disease 2019 (COVID-19), ang PYDO naglusad ug “Green Movement Program” nga gilangkuban sa coastal clean-up drive ug mangrove planting activity.

Aktibo usab ang PYDO nga nagsuporta sa pogramang “Kabataan Kontra Droga ug Terorismo” (KKDAT) aron pagsumpo sa  problema sa iligal nga droga ug terorismo sa komunidad.

Dugang pa ni Ismael nga nagpahigayon usab ang PYDO ug house-to-house visitation sa Badjao community ug nag-aghat kanila nga magpabakuna aron nga mapapanalipdan gikan sa makamatay nga COVID-19.

“Ang mga kabatan-onan adunay mga nagkalain-laing adbokasya tungod kay gusto sila makatabang sa komunidad ilabi na ning panahon sa pandemya,” panapos nga pahayag ni Ismael. (NBE/GCC/PIA-Zamboanga del Sur)