ZSPPO magpatuman ug ‘containment measures’ batok sa COVID-19

By Gideon C. Corgue

PAGADIAN CITY, September 11 (PIA)— Isip pagsuporta sa gipatuman nga Executive Order No. 2021-28 ni Governor Victor Yu, ang Zamboanga del Sur Police Provincial Office (ZSPPO) magpahigayon ug containment operations sa mga kalungsuran sa lalawigan aron nga mapugngan ang pagkuyanap sa COVID-19.

Sa gipahigayon nga press conference, gipahayag ni Colonel Roel Lami-ing, provincial director sa ZSPPO nga gimugna na niya ang mga tropa uban sa pag-abag sa mga frontliners aron mapugngan ang paspas nga pagsaka sa mga aktibong kaso sa COVID-19 sa lalawigan.

“Sa among kabahin isip mga law enforcers, gimugna na nako ang atong mga tropa sa ground sa nagkalain-lain nga mga munisipyo lakip na ang dakbayan sa Pagadian. Akong gi-deployed ang 300 PNP personnel sa ground ug ingon man dugang PNP ang nagdumala sa atong border control points aron makontrolar nato ang pagkuyanap sa COVID-19,” pagpahibalo ni Lami-ing.

Dugang pa ni Lami-ing nga gimugna na sa ZSPPO ang Quarantine Control Points sa mga boarders sa lungsod sa Kumalarang, Josefina, Midsalip, Tukuran, Dumingag ug Bayog aron sa pag-inspect sa mga tawo nga gikan sa silingang mga lalawigan kung naghupot ba sila sa mga gikinahanglang requirements sa ilang pagsulod sa lalawigan.

Ang 9th RCDG ug 53^rd Infantry Battalion, Philiipine Army ang committed usab pag-reactivate sa Inter-Agency Task Force aron motabang sa pagpatuman sa EO No. 2021-28. (EDT/GCC/PIA-Zamboanga del Sur)