ZSPPO, PAGPTD nagpahigayon ug tree planting sa dakbayan

 By Gideon C. Corgue

PAGADIAN CITY, Feb. 14 (PIA)- Nagpahigayon ang Zamboanga del Sur Police Provincial Office (ZSPPO) ug Provincial Advisory Group for Police Transformation and Development (PAGPTD) pagtanom ug mga kahoy sa barangay Manga ning dakbayan ning bag-ohay pa lang.

Matud pa ni LtCol. Modhin Pantaran, ang Deputy Provincial Director for Administration nga ang ‘Plant and Grow A Tree’ project ilang gihimo isip pagsuporta sa National Greening Program (NGP) sa kagamhanan ug pagpanalipod sa kalikupan aron nga makatabang pagsulbad sa problema sa global warming ug climate change.

Dugtong pa ni Pantaran nga mokabat sa 200 ka mga Lawaan seedlings ang gitanom sa mga stakeholders sa lima (5) ka ektarya nga luna sa yuta sa maong dapit.

Gidugang pa niya, strikto nga i-monitor matag-bulan sa mga stakeholders ang gipangtanom nga seedlings aron nga maseguro nga kini ang motubo ug mabuhi.

Gipahibalo usab ni Punong Barangay Sabas Bustamante, Sr. nga tabangan usab  pag-monitor sa mga barangay officials ang mga gitanom nga kahoy nga dili tugwayan sa mga hayop aron nga kini ang mabuhi.

Gikalipay usab ni Pantaran ang boluntaryong pagsalmot sa mga stakeholders nga nakatampo sa pagpadali sa ilang pagtanom sa nasangpit nga barangay.

Misalmot usab sa maong kalihokan ang mosunod: Kapisanan ng mga Brodkaster ng Pilipinas (KBP), Pagadian City Water District (PCWD).1^st Field Artillery (Beat ‘Em) Battalion, 1^st Cavalry (Tagapanguna) Squadron, 547 Engineering Battalion, ug mga barangay officials. (EDT/GCC/PIA-Zamboanga del Sur)