Fake news maoy hinungdan nga hinay ang vaccination roll out sa Imelda, Zamboanga Sibugay

 

By Gideon C. Corgue

PAGADIAN CITY, Sept 7 (PIA)— Si Mayor Roselyn Silva sa Imelda, Zamboanga Sibugay mipahilbao nga ang vaccination roll out sa COVID-19 hinay kaayo tungod sa nagkuyanap nga fake news sa social media.

Sa interview kang Silva sa Laging Handa Network Briefing program, iyang gibutyag 2,544 lamang ka mga tawo gikan sa target nga 30,425 ang nabakuhan batok sa COVID-19 o adunay 8.36% lamang ang nakab-ot gikan sa target niini nga 70% nga mabakunahan.

Matud pa ni Silva nga ang ubos nga rate sa kampanya sa pagbakuna sa  COVID-19 kini ang gumikan sa ‘fake news’ nga nagkuyanap sa social media nga maoy gituhuan sa daghan nga mga tawo sa ilang dapit. 

Gidugang pa ni Silva nga ang fake news nga nagkuyanap sa social media nagpahibalo nga human ang tawo mabakunahan mamahimo nga zombie ug kung mabakunahan sa Sinovac dili na maka-adto sa abroad.

Dugtong pa sa Mayor nga mas gipalig-on pa nila karon ang ilang kampanya sa pagbakuna pinaagi sa paghimo ug raffle draw sa mga magpabakuna diin nagpa-raffle ang local government unit ug appliances, 50 ka sako sa bugas humay ug uban pa, aron nga ilang makab-ot ang 70% herd immunity sa ilang lungsod.

Giawhag ni Silva ang nasudnong kagamhanan nga pahamtangan ug silot ug pasakaan ug kaso ang mga tawong responsable nga nagpakaylap sa fake news. (RVC/EDT/GCC/PIA-Zamboanga del Sur)