Lungsod sa Mahayag mapasalamaton sa kagamhanan paghatag P20-M sa barangay Paraiso

 

By Gideon C. Corgue

MAHAYAG, Zamboanga del Sur, October 11 (PIA)— Ang kagamhanang lokal sa lungsod sa Mahayag mapasalamaton sa nasudnong kagamhanan paghatag ug P20-M sa barangay Paraiso.

Kini mao ang gipahayag ni Mayor Manuel Saladaga sa programa nga ‘Laging Handa Network Briefing’ nga gidumala ni PCOO Secretary Martin Andanar ning adlaw’ng Lunes.

Matud pa ni Saladaga nga ang Barangay Paraiso nga usa sa mga Geographically Isolated and Disadvantaged Area (GIDA) nakadawat ug P20-M sa nasudnong kagamhanan pinaagi sa National Task Force to End Local Communist Armed Conflict (NTF-ELCAC) aron mapatuman ang infrastructure projects sa maong barangay.

Gidugang pa ni Saladaga nga gisugdan na paghimo ang konkreto nga dalan sa maong barangay aron nga masayon na kaayo sa mga mag-uuma nga mohatud sa ilang abot sa uma ngadto sa merkado ug ingon man masayon na usab sa lokal nga pangagamhanan paghatud sa mga basic ug social services sa maong dapit.

Gipasalamatan usab sa mayor ang kagamhanan sa lalawigan sa pagpahulam ug heavy equipment aron nga mabuksan ang dalan gikan sa Barangay Upper Salug Daku padulong sa Paraiso ug aron ang maong dalan mokutay ngadto sa sentro sa lungsod.

Pinaagi sa maong BDP project, dako ang pagtuo ni Saladaga nga ang Paraiso nga kanhi gisudlan sa mga rebelde hingpit na nga magmalinawon tungod kay gipabati sa kagamhanan ngadto sa katawhan ang ilang pagmahal pinaagi sa mga gipangtukod nga proyekto. (NBE/GCC/PIA-Zamboanga del Sur)