Malasakit Center nakatabang sa sobra 2 milyones nga Pilipino

 By Gideon C. Corgue

PAGADIAN CITY, October 8 (PIA)— Sobra sa 2-milyones nga Pilipino ang nakapahimulos sa Malasakit Center Program sa kagamhanan.

Kini ang gipahibalo ni Secretary Martin Andanar sa Presidential Communication Operations’ Office (PCOO) atol sa interview sa Easy Radio 96.7 FM ning adla’wng Biyernes.

Ang ‘Malasakit Center’ usa ka One-Stop Shop diin ang mga pasyente, maka-access sa pinansyal ug medikal nga tabang gikan sa mga ahensya sama sa PhilHealth, Philippine Charity Sweepstakes Office, ug Department of Social Welfare and Development.

Matud pa ni Andanar nga gipirmahan ni Presidente Rodrigo Duterte ang ‘Malasakit Center Act’, diin gitukod ang Malasakit Program ug gipahimutang ang Malasakit Centers sa DOH ug uban pang mga ospital sa gobyerno sa nasud.

“Gipirmahan ni Presidente Duterte ang Malasakit Center Bill nga gipangamahanan ni Senador Bong diin sobra sa 140 Malasakit Center ug sobra usab sa 2 milyones nga mga kabus nga mga tawo ang nahatagan sa libre nga tambal ug libre nga hospitalization sa tibuok nasud,” pagpahibalo ni Andanar.

Gidugang pa ni Andanar nga swerte kaayo ang katawhang Pilipino tungod kay aduna kitay gobyerno nga nagtuman sa iyang mga saad ug direkta nga mo-aksyon sa mga problema sa mga tawo.

Gipahibalo ni Andanar nga ang Malasakit Center ni Senador Bong Go iyang gi-awat kang Presidente Duterte sa dakbayan sa Davao nga naghatag ug tabang dili lamang sa mga mulupyo sa Davao kon dili lakip na ang taga laing dapit.

 “Ang Malasakit Center program gitukod ni Senador Go sa tibuok nasud aron nga daghan nga mga kabus ang matabangan sa mga serbisyo nga gihatag niini,” panapos nga pahayag ni Andanar. (NBE/GCC/PIA-Zamboanga del Sur)